Plantun de Prouvènço

Pèr coumpara dos planto d'encò nostre

Neotinea ustulata & Panicum barbipulvinatum

Cap-negre

Neotinea ustulata

Orchidaceae

Autre noum : Cannegre.

Nom en français : Orchis brûlé.

Descripcioun :
Lou cap-negre fai parti dóu "nouvèu" gènre Neotinea que caup li gau emé de flour e de fueio mai pichoto e que fan d'espigo de flour toujour proun sarrado. Es uno planto pulèu coumuno au printèms, e que se recounèis à si pichòti flour blanco e roujo emé uno labreto di quatre partido, picoutado de roso, e peréu à si casco de flour negrejant en boutoun ço que douno d'èr à un cap negre.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 50 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Neotinea
Famiho : Orchidaceae

Ordre : Asparagales

Coulour de la flour : Blanco Roujo
Petalo : irreguliero
Ø (o loungour) flour : 5 à 8 mm
Flourido : Printèms

Sòu : Ca
Autour basso e auto : 0 à 2200 m
Aparado : Noun

Liò : Colo - Prado umido - Garrigo
Estànci : Subremediterran à Subaupen
Couroulougi : Pancaro entresigna
Ref. sc. : Neotinea ustulata (L.) R.M.Bateman, Pridgeon & M.W.Chase, 1997

Mi(-de-ribeirés)

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.